सावलीला ऊन का चिकटून असते ?

वृत्त : मंजुघोषा
गण : गालगागा गालगागा गलगागा

 

सावलीला ऊन का चिकटून असते ?
गोम प्रश्नातच तुझ्या हटकून असते !

 

किलकिली बेचैनशी खिडकी तुझी ती
कूस का बदलीत रात्रीतून असते ?

 

गोड शब्दांना कसे त्यांच्या पटावे ?
कोण माझ्याशी कसे फटकून असते .

 

मी हिशोबाने कशाला जगत राहू ?
श्वास बोटांवर कुणी मांडून असते ?

 

वारलो मी , हे नका सांगू कळीला . .
रोज ती बागेत खोळंबून असते !

 

,

वा. न. सरदेसाई

Written by

" काव्य " हे सारस्वतांचे एक वाड्ःमयीन शक्तिपीठ आहे . दुर्गा , अंबा , चंडी , काली , भवानी ह्या आणि अशा देवता जशा एकाच शक्तीची अनेक रूपे आहेत ; त्याचप्रमाणे गीत , अभंग, ओवी , मुक्तछंद , लावणी , पोवाडा , दोहा , गझल , रुबाई इ. विविध स्वरूपांतून कविता प्रकट होत असते . . . . . . देवतांतील देवत्व आणि कवितांतील कवित्व ह्यांच्यात तत्त्वतः फरक नाही ; म्हणून भाविक आणि रसिक ह्यांच्यामधील आंतरिक नाते हे मुळात मनोगम्य असल्याने आध्यात्मिक नातेच आहे ! - वा . न. सरदेसाई

प्रतिक्रिया टाका