रडत मी होतो जरी

वृत्त : मेनका

गण : गालगागा  x २ + गालगा

 

रडत मी होतो जरी हसलो तरी
विझत मी गेलो जरी जळलो तरी !

 

ना कुणी वळला ऋतू माझ्याकडे
वाळवंटी एकटा फुललो तरी .

 

बिघडले तुमचे कुठे माझ्याविना ?
मजकडे पाहू नका दिसलो तरी !

 

लाव , मज प्याल्यातुनी ओठी तुझ्या
जाणवू दे , थेंब मी असलो तरी .

 

ह्या कुठे सरशीत आहे जीतही ?
शरण ते येतील मी हरलो तरी !

 

पालवे मीही कधी सोन्यातुनी
आपटा साधासुधा असलो तरी !

 

सादही घाला कधी दुरूनी मला . .
क्षितिज ओ देईल मी नसलो तरी !

 

.

वा. न. सरदेसाई

Written by

" काव्य " हे सारस्वतांचे एक वाड्ःमयीन शक्तिपीठ आहे . दुर्गा , अंबा , चंडी , काली , भवानी ह्या आणि अशा देवता जशा एकाच शक्तीची अनेक रूपे आहेत ; त्याचप्रमाणे गीत , अभंग, ओवी , मुक्तछंद , लावणी , पोवाडा , दोहा , गझल , रुबाई इ. विविध स्वरूपांतून कविता प्रकट होत असते . . . . . . देवतांतील देवत्व आणि कवितांतील कवित्व ह्यांच्यात तत्त्वतः फरक नाही ; म्हणून भाविक आणि रसिक ह्यांच्यामधील आंतरिक नाते हे मुळात मनोगम्य असल्याने आध्यात्मिक नातेच आहे ! - वा . न. सरदेसाई

प्रतिक्रिया टाका