का तुझ्या स्मृतींना खिळून बसलो आम्ही ?

वृत्त : भूपति

लक्षणे : एकूण मात्रा २२ ( – प प – + ) .

प म्हणजे ८ मात्रा . + म्हणजे निच्छित गुरू .

 

का तुझ्या स्मृतींना खिळून बसलो आम्ही ?
मन मजेत जखमी करून बसलो आम्ही !

 

टकमका प्रियेचे मुख चंद्राने बघता ,
जवळचा दिवा मालवून बसलो आम्ही !

 

अंगणात येता नशीब अपुल्या  पायी ,
पायर्‍या घराच्या खणून बसलो आम्ही .

 

कोरडी सांत्वने तुझी मिळाली तेव्हा . .
पापणीस अश्रू टिपून बसलो आम्ही !

 

आमच्या पिढीतिल असंख्य झाडे वठली . .
अन् बघा , कसे मोहरून बसलो आम्ही !

 

‘ जाणत्या ‘ जगाचे पितळ पडावे उघडे ,
हे वेड पांघरत म्हणून बसलो आम्ही !