इवले गाणे . . .

ओठावरती आली गुणगुण

झाले इवले गाणे

मोर नाचतो तसे देखणे

नाचू आनंदाने . .

 

करा साखळी उचला पाउल

झुकझुक गाडी वळणे घेइल

तिकिटे काढा . .  वेलींवरची हिरवी  हिरवी पाने . .

 

गिरवित जाती फूलपाखरे

वेलांटीची रंग-अक्षरे

ओठ शिवा बोटांनी गुपचुप पकडू  उडती राने . .

 

मनांतून व्हा  उंचउंचसे

नभात उभवा हात जरासे

तरंगणार्या ढगांस लुटुनी घ्या किरणांचे सोने . .

 

निळ्या तळ्याच्या काठावरती

वाकुनि थोडे बघा खालती

पाण्यावरचा फोटो पाहुन खुदकन गाली हसणे . .

 

 

 

वा. न. सरदेसाई

Written by

" काव्य " हे सारस्वतांचे एक वाड्ःमयीन शक्तिपीठ आहे . दुर्गा , अंबा , चंडी , काली , भवानी ह्या आणि अशा देवता जशा एकाच शक्तीची अनेक रूपे आहेत ; त्याचप्रमाणे गीत , अभंग, ओवी , मुक्तछंद , लावणी , पोवाडा , दोहा , गझल , रुबाई इ. विविध स्वरूपांतून कविता प्रकट होत असते . . . . . . देवतांतील देवत्व आणि कवितांतील कवित्व ह्यांच्यात तत्त्वतः फरक नाही ; म्हणून भाविक आणि रसिक ह्यांच्यामधील आंतरिक नाते हे मुळात मनोगम्य असल्याने आध्यात्मिक नातेच आहे ! - वा . न. सरदेसाई

प्रतिक्रिया टाका